كان يا ما كان في قديم الزمان، كان في الشارع العربي.. و كان الشارع العربي عفي و لمَّا يغضبه أحد، كان يعصِّب و يصرخ و يقول جاي يا أهل البلد جاي.. و بعدين لما كان حد يضايق ابنه الشارع الفلسطيني و لَّا الشارع اللبناني و لَّا يا عيني حدا يطخطخ على إبنه الشارع العراقي، كان يجشب و يستنكر و يطلع الشرار من عينيه. و يا ويل إلي بيتجرأ على الإسلام و لَّا على النبي محمد عليه الصلاة و السلام؛ كان الشارع العربي ينقمص و يصوم عن السوبرماركت و يصير ياكل فلافل و دقة وزيت و يبطل عن الكنتاكي و الهمبرجر بس إذا من غير الفينو كان يأكلها.. و كانوا جيرانه دايماً يسمعوا صراخه على زوجته الرابعة صاحبة الجلالة، و أحياناً كانوا بيسمعوه بدلِّلها... لكن في واحدة من الجارات قالت مرة إنها حتى لو شو ما عملها عمرها ما ترضى.

و في يوم من الأيام و بعد ما واحد من أصحابه الوحشين ضحك عليه كالعادة و شرَّبه سيجارة من إياهم، راح سطَّل و لأنه كان تعبان كتير من المظاهرات و الاحتجاجات علشان البابا قال كلام مش ولا بد عن الإسلام، فراح أخد غفوة و راحت زوجته الرابعة مدام صاحبة الجلالة تصحيه علشان اليهود اجتاحوا وبهدلوا بيت حانون إلِّي في فلسطين و صار الدم هناك للركب.. فِكرها يعني يصحصح شوي و يروح يقدحلو صوتين لكن لا حياة لمن تنادي؛ تخضوه، تهزه، تجيب و تودي و أبداً الرجال معبي الطاسة و لا على باله..

و لما طولت الحالة، راحت صحَّت اثنين من ولاده و أخدوه على المستشفى الأمريكاني إلي في وسط البلد و دفعت الشيء الفلاني.. و بعد ما أخذوا العينات و أجروا الفحوصات و اجتمعوا و عملوا و سووا، تبين إنه أخينا ماخد جرعة مخدر زايدة و إنه على أثرها أصبح من الصعب التحكم بصحوة المذكور.