تركت دفا البيت..

وراحت تلعب على المرج

وكان الصبح بعده صغير

والندى على وراء الياسمين لاعب شعراتها

وطارت حوليها فراشات وعصافير

لحقت الفراش دلها على الهدهد

ما حدا بعرف الهدهد متلها

عرفه طالع نازل..

بيتمشى وعيونه عليها..

خايف منها.. وعيونه الحزينة على عينيها

انشغلت عنه بالسما الموشحة بالنار

وصارت تجري ورا غيمة صغيرة متلها

تمد إيديها للسما بدها تطولها

بس ما ساعدها طولها

تعبت من الجري

قعدت ترتاح وصفنت بهالدني

بالشمس إلي حميت..

وبالنار إلي انطفت..

وبالمرج إلي احترق..

وبحجار فوق حجار عليت

بشعرها طول وقصر

وبجسما طال ونفر

وبعمرها صار يجري

وببطنها علي ونزل

خلصت الصفنة وإجا عليها صبح جديد

ما في مرج وما في ياسمين

وما في شمس وما في فراش

وما في عصافير..

صبح عجوز نكد

حتى البيت رجعت له

ما لقت فيه دفا ..

شو اشتاقت للدفا..

ولحضن إماها..

ولرحم إماها..

وشو اشتاقت لهداك الصبح

وقت كان الهدهد ماشي يترقب

كانت مفكرة إنه خايف منها..

طلع يا حرام خايف عليها

يا هدهد وينك احترقوا الوردات

وردة وراها وردة..

ضاع العمر..

وخلصت الحكايات

.....

سماهر الخزندار

9/12/2007