حكايات : لا للنكد و النكدية

أنا سماهر بس مش النكدية الكبيرة لا... أنا سماهر الصغيرة عمري شي 7 أو 9 سنين.. واليوم حابة أعرف عن نفسي في رسالة إلى الأخت النكدية سماهر .. الكبيرة قصدي:

أنا يا ست نكدية.. قصدي سماهر كنت متخبية في راسك طول السنوات الماضية، من لما كان عمرك مثل عمري، و من يومها لليوم و أنا ما بشوف منك إلا النكد؛ أيوة إنت نكدية، و كل ما حاولت أفرفشك ما في فايدة دايماً قلبها جد و عقداهم 11. أنا على العموم كنت بعمل بأصلي و كل ما إجت فرصة كنت أطلع و أعمل شو عسل. يعني إذا في حدا بيفكر إنك أنت إلي حبوبة و دمك خفيف بيكون غلطان.

أنا هلأ زهقت منك و صار لازم أوقفك عند حدك عملالي فيها شهيدة.. شو يعني إنك فلسطينية ما كلنا فلسطينيين و عايشين ما أحلانا.. صحيح نص البلد أرامل و ثكالى و أيتام بس يعني هذا نوع من التوازن الطبيعي حتى ما نكتر زي الصينيين بعدين الناس بتصير تقر علينا.. و إذا نسيت حال الناس، بتقلب سياسية عصرها و زماناها، و بتعمل فيها مينانرامر موحد القطرين.. هذا نارمرفرعوني على الطاسة إلي بحطها على راسة حلوة كتييييرفي نسر و حية كبيرة و .. مش مهم ما علينا نرجع لموحدة الصف: إحنا شو دخلنا في السياسة حتى السياسة على رأي الشاعر الشعبي العظيم تياسة..

خلصنا من السياسة بتقلب بتقول في مشاكل كتييير في الشغل مهو من الحنبلة تبعتك يا ختي شو يعني لما ما تشتغلي بتخصصك و لا مؤهلاتك و شو يعني 7 سنين و 10 سنين خبرة ما إنت شايفة إنه في ناس إلهم 20 سنة خبرة و ما أخدوا شي.. حتقولي كفاءة سلميلي على الكفاءة المهم الكفاءة الحزبية يا بنتي و بعدين بطلي نق على الناس الكُمل هو إنت من وين تتوصلي للمجاهدات الحمساويات و لا للثوريات الفتحاويات خليكي بحالك و كلي بطاطا..

خلصنا من الشغل تعالي للبيت ضلي نكد...

- إلى هنا أعزائي القراء نكتفي بهذا القدر من الفضائح و نأسف لوجود مشكلة في الإرسال... سلام .... سماهر الكبيرة J

- لا تفكروا إنها ضحكت لحالها أنا أنا كنت بذغذها