برأي الذي يجري الآن هو ليس التنازل عن حق العودة .. فهذا لايستطيع احد ان يسلبه من اصحابه ..
اعتقد ان الذي سيجري هو التنازل عن الحق في المطالبة بحق العودة .. مقابل تسوية جزئية لبعض الحالات الفردية والانسانية وذلك برعاية عربية ودولية
وحكومة وحدة وطنية ..

مرحبا جوزيف..

أولاً / يسعد مساك.. كتيير مبسوطة بهالزيارة الي دائماً بستناها.. يعني نوع من التعود إلى قرب على الإدمان على رأي حلا :)

ثانياً / قراءتك لما سيحدث فيها الكثير من المنطق.. يعني ممكنة التطبيق من وجهة نظر سياسية.. لكن إحنا الناس العايشين على أرض الواقع بنقول الكبار حرين شو ما بدهم يعملوا ما بدهم يطالبوا بلاش.. بدهم يعملوا تسويات يجيبوا بعض الناس أهلاً و سهلاً هم حرين.. و كمان إحنا أحرار حق العودة حق فردي و مع احترامنا الشديد للحكومة العظيمة و للرعاية العربية و الدولية، لا يحق لأحد أن يساوم أو يجري تسويات فيما يخص عودتنا دون تخويل رسمي منا و هذا عشم إبليس بالجنة (التخويل الرسمي بقصد) و علشان ما أطول عليك خلي التسويات تتم و المعاهدت تُبرم لكن نقض هالمعاهدات لن يكون حكراً على اسرائيل إذا تجرأ أحد و باع قضيتنا.. و من جانب آخر قضيتنا لا تتداعى بالتقادم.. أعتقد إنه المعنى واضح..

شو رأيك بهالتناحة :)

برافو عليك يا سما ، بحييك على هاد الموضوع ، وبأكد على كل كلمة حكيتيها .

شكرا كتير الك.

شجاعة...................................................................................................................................................................................................................
تحياتي

شكراً كتير يا حلا.. هاد إلي بنتوقعه دائماً من أهل الأردن أخوتنا إلي قلوبهم على قلوبنا وبيساندوا قضيتنا..

أهلا بك أخي قاسم في حكايات.. أول مرة أوقف قدام تعليق ما أعرف كيف أرد عليه يمكن لأنه كلمة واحدة مختصرة.. شجاعة.. بيتهيألي إلي بدو يعيش حياة متل إلي عايشينها يا بكون شجاع يا بجن :)

شكراً على الزيارة و التعليق..

كيلا يكون عادة

www.miasdlsm.jeeran.com

أهلا بيك يا مياس !!!!
بس بجد ما فهمتها هاي "لكي لا تكون عادة"

على العموم نورتنا :)

آها اسم مدونتك لكي لا تكون عادة.. حاضر يا عم على راسي بزورها.. بس اسمحلي مش الآن..

سلامات

مرحبا سماهر .. شلونك اليوم ...
والله منيح زيارتي مرحب فيها..كلك ذوق..
رح احكيلك شغلة مابعرف اذا رح تعبر عن مغزى واضح .. بس لازم يكون في مراجعة نقدية لنضال الشعب الفلسطيني طيلة القرن الماضي .. وما بتوقع اي نتائج بدون هالمراجعة الجريئة ... والتي يبدو ماحدا مفكر يقوم فيها احزابا ومؤسسات.
كان عندي شلة صحاب فلسطينين اواخر الثمانينات قبل حرب احتلال الكويت ..
وكانت الانتضفاضة الفلسطينية الاولى على نهايتها وفي بوادر لعملية اوسلو ..
بس كل هذا غير واضح ...
سألت رفيقي مروان ..
عن جد يازلمة هلق بكرة اذا اتفقوا على اراضي ال 67 ورجع عرفات والشباب باتفاق معين رح ترجع انت ..
رح قول مختصر الجواب : انو عودة وانو سخام ليش انا عندي شي لأرجع الو .. بعدين مابتعرف انو انا أممي ..
كل بلدان العالم وطني ... بس يعني الواحد منا لازم يناضل على الأقل مشان يسترجع كرامته ..
يعني على القليلة بصير في اسم دولة فلسطين ووقتها بيعطونا جوازت سفر وما بيعود ابن كلب يقول عنا لاجئين ..

هلا جوزيف.. طبعاً زيارتك مرحب فيها ولو؟؟ بس المرة الجاي احملك شي كيلو تفاح.. ما تيجي و إيدك فاضية:)

بس خلص بكفي مزح لنحكي الجد: في مغزى؟ طبعاً في مغزى .. المغزى إنه اللاجئ إلي شردته اسرائيل تبهدل و انذل في الدول العربية.. فعلاً الموضوع موضوع كرامة بقدر ما هو موضوع وطن.. بس بالنسبة لأنه الأخ أممي فهذه وجهة نظر شخصية تعبر عن الشخص نفسه.. أبي عاش معظم عمره بغزة و غزة هاي بفلسطين مش في أمريكا ومن ساعده وقف على رجليه و أمن إلنا حياة كريمة لكن كل ما حدا تحركش فيه وقالوه صرت غزاوي كان يقول فشرت لو إصبعي يصير غزاوي لأقطعه أنا من يافا وبرجعلها.. هاي قصة مقابل قصتك بس لو إنا في مكان بيزوروه لاجئين كتير ما بتتصور عدد القصص إلي راح تسمعها.. أنا بعمري ما شفت يافا لكن أبي زرعها في زراعة ما كان يقعد يقول محاضرات إنه لازم نرجع و لازم نقاوم ولازم نسترد حقوقنا.. كان ببساطة يحكيلنا عنها و كانت أكتر لحظاتنا شغف و سعادة معه لما كان يلمنا حوالين الكانون ويحكيلنا عن العجمي وسكنة الحلوة و روبين و ميدان الساعة هلأ صاحبك شو حكاله أبوه عن بلده ما بعرف بس زي ما أنا بتنفس هلأ بعرف إنه انذل في البلد العربي إلي كان لاجئ فيه..

والآن دوري أحكيلك شغلة ما بعرف إذا راح تحملك مغزى واضح ولا لأ اللاجئن الفلسطينيين لما طلعوا من بلادهم ما سكنوا فنادق خمس نجوم تمرمطوا في الخيام ومن بينهم أهلي أبي و عمامي و عماتي أنا ما واجهت الأهوال إلي شافوها بس شفتها على وجوهم.. الزمن ما بيمحي الأسى عن الوجوه الحزينة و لو ضحكت ولو غنت.. بتضل أودية الأحزان تشق الخدين و بضل القهر ينبع من العينين ويسقي في أرواح إلي ما شافوا وما عرفوا.. اليوم بغزة و بالضفة اسأل إبن خمس سنين عن القهر بتحكيلك عينيه قصائد..

تصبح على كرامة.. تصبح على وطن

أختي العزيزة سماح
السلام عليكم و رحمة الله و بركاته
موضوعك شيق كثيرا
و أقول لكل من يدعي أن المبعدين قسرا عن الوطن بأنهم ينعمون بالحياة
أنهم لا يرضون هوية إلا هويتهم
ولا ترابا إلا ترابهم
الحياة تحت القصف جنة
الجوع جنة
العطش جنة
مادام على أرض الوطن
و أقول لهم أن قطران الوطن أحلى من عسل بلدان ثانية للعيش بها
و لا عودة عن حق العودة
أختك سعاد البدري

يا هلا و غلا بسعاد،،

إخوانا في المغرب كانو دائماً سباقين لمساندة القضية الفلسطينية.. أنا بحييك و بحيي كل أهل المغرب الغاليين.. و أكيد ما في عودة عن حق العودة

أختك سماهر

أختي سمــــاح

السلام عليكم ورحمة الله وبركاته
مرحبا بكي أخت سماح وتحياتي لجميع قرائكي الكرام

أولا : يسرني أن أحيي فيكي الوطنية وحبكي للوطن فكما نجدها عن البعض نفقدها في البعض
ثانياً : يسرني أن أنحني إحتراماً لكم على هذه المقالات الجيدة فعلاً وأتمنى أن يبقى هذا القلم دوماً لمثل هذه المواضيع
----------------------
القضية الفلسطينية هيا قضية وطن قضية مواطن عربي فكلنا عرب اداً فهية قضية كل مواطن عربي كان فلسطينيا او مصريا او مغربيا او غيره... لطلما نددنا وصرخنا ونضمنا مظاهرات واحتجاجات وغيرها من جميع انواع التعبير عن الاستنكار والغضي والقلق الدي ينتابنا كشعب مغربي على الاوضاع في بلاد فلسطين فكما ترين لم نجني من هذا شيئاً مقنع اللهم مساعادات وغيرها
متى كانت المساعدات = استقلال الوطن
لكن يبقى أمل في رجوع كل مواطن لوطنه ليعيش تحت سقف القصف والتقتيل الوطن يسري في دم كل من يمتلك الوطنية وحب الوطن .

البستاني

الأخ البستاني من المغرب..

سعدت حكايات بالزهرة الجميلة التي زرعتها على صفحاتها حين مررت للزيارة .. شكراً لإطرائك و أهلا بك دائماً صديق و جار غالي..